واحدة من أكبر المشاكل اللي ممكن تقابل أي حد عنده شركة، هي إنه يقدر يتعامل مع التأمينات ويعرف النسبة اللي بيستقطعها التأمين من المرتب الخاص بالموظفين عنده وهو هيدفع قد إيه والموظف قد إيه؟

قبل ما نتكلم ونعرف إزاي تقدر كصاحب شركة تعرف النسبة دي، فيه مصطلحات بسيطة هنستخدمها في كلامنا بعدين لازم تكون عارفها وهي كالتالي:


- المرتب الشامل: وده المرتب الشامل الخاص بالموظف قبل خصم التأمينات والضريبة.
- المرتب الصافي: وده المرتب اللي الموظف بياخده فعليا بعد ما يتم خصم التأمينات والضرائب وأي خصومات تانية.
- حصة العامل التأمينية: وده الجزء التأميني اللي الشركة بتخصمه من المرتب الشامل علشان تدفعه للتأمينات.
- حصة الشركة التأمينية: ده الجزء اللي اللي الشركة بتدفعه من حسابها للتأمينات بالنيابة عن كل موظف شغال عندهم.

- الـ1% الخاصين بمكتب العمل: دي نسبة 1% بيتم خصمها من قيمة الأساسي التأميني (اللي هنعرفه بعدين) وبيتم تحوليها لمكتب العمل، ودي بتكون نسبة بسيطة جدًا، والشركة اللي بتدفعهم مش الموظف.
- الأساسي التأميني: هو رقم يتم وضعه بُناءً على المرتب الشامل ويكون 40% من المرتب الشامل بحد أقصى 1370 لحساب التأمينات على أساسه.
- المتغير التأميني: وده رقم بيتم وضعه بُناءً على المرتب الشامل ويكون 35% من المرتب الشامل بحد أقصى 2430 وعلى أساسه بتتحب التأمينات.

* إزاي نحسب الحصة اللي الشركة بتدفعها والعامل بيدفعها للتأمينات بالنسبة للأجر الأساسي والأجر المتغير؟

- بالنسبة للأجر الأساسي، فيه 14% يتحملها الموظف (بتتخصم من المُرتب بتاعه). و 26% بتتحملها الشركة (لا تخصم من مرتب الموظف). - لكن الأجر المتغير، فيه 11% بيتحملها الموظف، و24% بتتحملها الشركة نفسها.


* خلينا ناخد مثال، لنفترض إن موظف مرتبه = 3000 جنية، نسبة التأمينات اللي يدفعها كام؟ واللي تدفعها الشركة كام؟

1) 3000 * 40% = 1200 جنية، المبلغ ده هوا الأساسي التأميني بحد أقصى 1370 جنيه.
2) 3000 * 35% = 1050 جنية، وده المتغير التأميني. والمبلغين دول هما اللي هنشتغل عليهم ونعرف منهم الفلوس اللي هتتدفع للتأمينات بحد أقصى 2800 جنيه.

المبلغ اللي اللي الموظف هيدفعه للتأمينات = (1200 * 14% = 168ج) + (1050 * 11% = 115.5ج) = 283.5 جنية.
المبلغ اللي الشركة هتدفعه للتأمينات = (1200 * 26% = 312ج) + (1050 * 24% = 252ج) = 564 جنية.

فيه طرق تانية بعض الشركات بتستخدمها علشان تخفض من قيمة التأمينات على الموظفين؛ عن طريق إنها متستخدمش الحد الأقصى. لو عندك أي استفسار أو سؤال عاوز إجابة عليه، أكتبه لينا في الرسايل أو الكومنتات وإحنا هنجاوبك عليه.

Search
Latest