في العادة بيتم الخلط بين حاجتين مهمين ومختلفين عن بعض: ريادة الأعمال، وامتلاك أعمال تجارية صغيرة. ريادة الأعمال بتقود لتأسيس شركات ناشئة، إنما التانية بتقود لإنشاء شركات صغيرة ومتوسطة. والفرق بين الإتنين زي الفرق بين محل البقالة وشركة فيسبوك. إزاي؟ هنوضح لك:

الشركات الناشئة (Startup) بتكون شركات حديثة هدفها تكبر وتدور على سوق. إنما الشركات الصغيرة والمتوسطة دي شركات موجود ليها سوق وإيرادات وعدد ثابت من الموظفين. الفرق بين الإتنين إن الأولى هدفها التغيير والثورة في المجال الخاص بيها، إنما التانية هدفها الثبات والحفاظ على حصتها في السوق.



اللي عنده عمل تجاري بيكون هدفه يطور الشركة دي شوية علشان توصل لمستوى الشركات المتوسطة، عاوز عائد مناسب يكفيه، والنوع ده بيكون فردي: بيأسسه شخص واحد، وكمان خاص: يعني مفيش فيه مستثمرين. ممكن يكون محل بقالة مثلًا أو سلسلة سوبر ماركت.
إنما الشركات الناشئة فهي شركات غرضها النمو والتوسع قدر الإمكان. الشركات اللي بتكون ليها رسالة وهدف كبير، زي إنهم يغيروا العالم أو يحسنوا من التعليم والصحة وخلافه.

الفرق التاني بين النوعين إن صاحب العمل التجاري الصغير ده بيكون حذر وميقدرش يخاطر كتير، وبيبحث عن فكرة نجحت علشان يقلدها، محلات البقالة، تصوير المستندات وغيره.
إنما الشركات الناشئة فهيا الشركات اللي بتقوم على الإبتكار والإبداع والبحث عن كل فكرة جديدة محدش فكر فيها قبل كده.

ممكن تسأل نفسك: الشركات الناشئة أحسن ولا الشركات الصغيرة؟

طالما الهدف النهائي لكل نوع منهم مختلف (التوسع عكس الثبات) فالمقارنة لا تجوز. لكن لازم تحدد الأول إنتا هدفك إيه؟ يعني إيه الغاية اللي عاوز تحققها من الحاجة دي؟

عاوز حياة مستقرة ودخل مضمون أكتر، ولا حابب المغامرة وإنك تبني حاجة فريدة من نوعها وميبقاش ليك حدود؟ هل إنتا قادر تبدع في المجال اللي هتدخله ولا إبداعك محدود؟

إدرس الخيارات دي، وشوف إمكانية التمويل، القوانين اللي هتنظم لك أي واحد من الإتنين.. إدرس كل الجوانب دي قبل ما تنشأ شركتك أو تعمل مشروع صغير، أو حتى تكتفي بالعمل كموظف في شركة تانية.

ولو عندك أي استفسار بخصوص تأسيس شركة أو مشروع خاص بيك كلمنا وإحنا في #العنود هنساعدك ونجاوبك عليه، تقدر تبعت لنا في رسايل الصفحة أو تكتب لنا في الكومنتات وهنكون سعداء بالرد عليك.

Search
Latest